Novas

María Pérez Lago recibiu un dos premios Ícarus 2026 que concede a Universidade de Santiago de Compostela e que distingue teses de doutoramento e traballos de fin de grao e de mestrado con capacidade de transferencia e aplicación práctica. En concreto, María Pérez Lago foi premiada na área de Artes e Humanidades polo seu traballo de fin de mestrado Avaliación de tecnoloxías de síntese de voz: un estudo de dous modelos TTS para a lingua galega, dirixido por Xosé Luís Regueira e relacionado directamente co labor que realiza o Instituto da Lingua Galega no marco do Proxecto Nós.

Nova no xornal da USC.

O 29 de maio tivo lugar a III Xeira CLARIAH-GAL na Facultade de Filoloxía da Universidade de Santiago de Compostela, que contou coas conferencias de Aritz Farwell, sobre o corpus PressMint, e de Nieves Pena Sueiro, sobre literatura e Humanidades Dixitais. Na xornada, organizada polo Instituto da Lingua Galega, presentáronse ademais sete comunicacións e vinte pósters, dos cales dezaoito están dispoñibles en Zenodo. Ademais, varias das comunicacións e das conferencias poden verse na canle de YouTube do ILG:

• Primeira sesión con Aritz Farwell (HiTZ, EHU), Miguel García-Fernández (IEGPS, CSIC), Ricardo Pichel (UNED) e Óscar Alonso (UVigo).
• Segunda sesión con Xusto A. Rodríguez Río (SNL, USC), Ana I. Boullón Agrelo (ILG, USC), María Álvarez de la Granja e Elisa Fernández Rei (ILG, USC).
• Terceira sesión con Mar García Miraz (Arquivo de Galicia) e Carlos-Caetano Biscainho-Fernandes (UDC).

21/04/2026, Universidade de Vigo

Adina Vladu, investigadora do ILG no Proxecto Nós, participou o 21 de abril na xornada A IA xerativa tamén en galego. Dereitos lingüísticos e boas prácticas para a docencia tecnolóxica, organizada pola Universidade de Vigo. Vladu integrou a mesa redonda “Recursos lingüísticos e terminolóxicos para a docencia en galego no ámbito tecnolóxico”, en que se tratou o papel da lingua galega no ámbito tecnolóxico nun contexto marcado polo rápido desenvolvemento da intelixencia artificial. Presentáronse recursos lingüísticos e terminolóxicos dispoñibles para a docencia en galego e reflexionouse sobre os retos e as oportunidades que presenta a IA para a nosa lingua.

10/02/2026, Instituto da Lingua Galega

O Consello Científico do Instituto da Lingua Galega da Universidade de Santiago de Compostela acordou por unanimidade, nunha reunión que tivo lugar o 10 de febreiro na súa sede, propoñer o investigador Vítor Míguez como coordinador de CLARIAH-GAL. O reitor aprobou o seu nomeamento con efectos desde o 16 de febreiro de 2026.

Míguez desenvolve a súa investigación na gramática do galego desde a lingüística de corpus, unha liña que conecta directamente cos obxectivos de CLARIAH-GAL: integrar recursos, ferramentas e tecnoloxías lingüísticas ao servizo das humanidades dixitais.

21-23/01/2026, As Palmas de Gran Canaria

Os investigadores do Instituto da Lingua Galega Diego Rivadulla e Vítor Míguez participaron, en representación de CLARIAH-GAL, na reunión de CLARIAH-ES que tivo lugar nas Palmas de Gran Canaria entre o 21 e 23 de xaneiro de 2026.

O encontro, organizado polo Instituto Universitario de Análisis y Aplicaciones Textuales (IATEXT), tivo como obxectivo reunir os distintos nodos estatais de CLARIAH-ES para facer balance do traballo realizado ao longo do último ano, compartir avances e fixar as liñas de actuación a curto e medio prazo.

Xa se encontran dispoñibles na canle de Youtube do Instituto da Lingua Galega (ILG) algunhas das intervencións do Simposio ILG 2025. A intelixencia artificial e a lingua galega: oportunidades e riscos, evento organizado polo ILG que tivo lugar do 18 ao 20 de novembro de 2025 na Facultade de Filoloxía da Universidade de Santiago de Compostela.

Ligazóns

• Sesión do 18/11/2025 con Senén Barro Ameneiro (CiTIUS, USC), Arturo Montejo-Ráez (UJA) e Pablo Gamallo (CiTIUS, USC).
• Sesión do 20/11/2025 con Carmen García Mateo e Martina Fuentes Morono (atlanTTIC – UVigo), Luís Míguez Macho (USC), Gaspar González Somoza (actor de dobraxe), Beatriz Fariñas Garrote (AGPTI), Isabel Blanco (AISGE) e Belén Regueira (Colexio de Xornalistas).

Ligazóns

• Sesión da mañá con Elisa Fernández Rei (ILG, USC), Arturo Montejo-Ráez (UJA), Noelia Bascuas Ferreiro (Biblioteca de Galicia, Xunta de Galicia), Pablo Ruiz Fabo (Université de Strasbourg / CiTIUS, USC) e Carlota Fernández Travieso (UDC).
• Sesión da tarde con Javier Pérez Guerra (iLingua, UVigo), Pedro García Louzao e Xulio Sousa (ILG, USC) e Leticia Eirín (UDC).

Acaba de facerse pública a versión 5.0 do corpus ParlaMint, na que o Instituto da Lingua Galega e o Proxecto Nós participan coa compilación e anotación dos datos do Parlamento galego (ParlaMint-ES-GA). ParlaMint é un proxecto no marco da infraestrutura dixital europea CLARIN, centrado na creación dun corpus de textos multilingüe, comparable e homologado de sesións parlamentarias europeas.

Esta nova versión permite a anotación automática por temas e a anotación automática dos sentimentos nas intervencións. Ademais, inclúe os corpus ParlaMint 5.0, os corpus ParlaMint.ana 5.0, enriquecidos con anotación lingüística automática, e os corpus en versión multilingüe con tradución automática ao inglés ParlaMint-en.ana 5.0.

08/07/2025, Asociación de Humanidades Digitales Hispánicas

A Asociación de Humanidades Digitales Hispánicas (HDH) vén de resolver a VII Edición dos Premios HDH. Na modalidade “mellor ferramenta, recurso, infraestrutura desenvolta en 2024” recibiu o premio CLARIAH-ES, infraestrutura dixital de investigación integrada por doce entidades entre as que se encontra CLARIAH-GAL, nodo coordinado polo Instituto da Lingua Galega da Universidade de Santiago de Compostela.

09/05/2025, Facultade de Filoloxía (USC)

O 9 de maio tivo lugar na Facultade de Filoloxía da Universidade de Santiago de Compostela a II Xeira CLARIAH-GAL, organizada polo nodo CLARIAH-GAL. Esta segunda edición, á que asistiron unhas cincuenta persoas, contou con oito relatorios en que se presentaron diversos proxectos de Humanidades Dixitais desenvoltos no ámbito galego e con dúas conferencias plenarias de Arturo Montejo (Universidad de Jaén) e Patricia Martín Rodilla (CSIC). Ademais, na sesión de pósters déronse a coñecer 22 iniciativas no ámbito das Humanidade Dixitais.

As presentacións dos relatores convidados e os pósters seleccionados pódense consultar e descargar na páxina web do evento nas seccións “materiais” e “pósters”.